Feba muito que no escribiba aquí, asinas que no me lo tiengatz en cuenta. Tampoco no descubriré cosa por lo que voi a dicir, pero ye que ahiere estié con ista ideya tot lo diya en o tozuelo y daba ta bella cosa más que una ringlera de tuitz. Que o periodismo ye degradau no ye nuevo. Que clamamos periodismo a lo que antis yera periodismo pero ya no, tampoco no ye nuevo. Que os meyos teoricament seriosos han dentrau en a mesma guerra por o click que os meyos no tant seriosos, tampoco no ye nuevo. Pero con tot lo que mos ficamos con os “cuñados” a no-favor que ye fendo iste no-periodismo a las meyas verdatz, a las pleitinas en chentas familiars y a chent completament segura d’una cosa que no ye verdat ni de luen ye impagable.
Ahiere tot o mundo yera aguaitando por a rueda de prensa d’a NASA. Que heban trobau 7 planetas similars en tamanyo a la nuestra quiesta y malmesa Tierra se sabeba dende o diya anterior por una filtración y puestar que por ixo, totz asperabamos “bella cosa más”, asinas que a carrera por o click prencipió con teasers, pero sobre tot, con falsedatz. Ta contrimostrar-lo iste tuit d’un director de periodico serioso:
De garra traza a NASA ha trobau augua en garra d’os siete planetas, dentre atras cosas porque no tenemos encara a tecnolochía ta veyer cosas como ista. En a nota que emitié a NASA, y en a rueda de prensa, se cuidoron de fer servir o condicional. Bi ha condicions ta que bi haiga augua, pero no saben encara si bi ha augua. Y prou que tampoco no saben si bi ha vida, y mesmo no saben de que materials son feitos os planetas. Pero, prou que sí, en a carrera por o click, truca más o ficacio dicir “planeta con augua” que “A Nasa troba bells planetas an que podria haber augua”. No estió l’unico meyo que tituló con meyas verdatz o mentiras de raso, porque bi heba muita chent que quereba tota la información y mesmo más d’a que a NASA dio. Como ye de dar, terreno abonau ta conspiradors, pseudociencias y “cuñados” que saben muitismo más que os d’a NASA.
Tampoco estió a unica noticia que salió d’o suyo conducto natural. L’anecdota d’o president islandés que fació una broma dicindo que “viedaría as pizzas con pinya” ha esdeveniu noticia mundial y totz os meyos quieren fer a suya. Prou que garra meyo ditz que siga una broma, prou que a reflexión de dimpués d’o president islandés ocupa nomás que pietz de pachina.
En ista reflexion o president islandés deciba que no tiene o poder ta fer-lo y que suerte que no la tiene, que no li feria goyo vivir en un país an que os presidents puedan viedar tot o que no lis cuaca. Ista puestar seria a reflexión important, en un país que engarchola raperos por fer letras contra la monarquía o chuzga dibuixants de comics y mesmo censura revistas porque o conteniu ye de “mal gusto” mientres que totz fa no guaire yeran Charlie.
Pero ista carrera de trash-periodismo, de cazadors de clicks transvestius de meyos seriosos encara no ye o piyor que li pasa a o periodismo, pero ixe ya será ta unatro post. Un post que m’habré de pensar cada vegada que femos publicidat, u cada vegada que no deixamos que a reyalidat siga la noticia. Deciban que a prensa de paper ye muerta, pero lo que ye muerto ye o periodismo, dichital u no, si continamos por ista endrecera. O periodismo dichital veniba a salvarnos d’a decadencia d’o paper, y cada vegada más ha esdeveniu en un mundo centrado en ganar clicks, sin que sirva ta la suya función, informar a la chent.
Ye verdat que no bi ha lectors si no i dentran, pero si dentran ta leyer cosas que directament no son verdat, no habremos avanzau cosa. Tot lo contrario, baixo a capa d’a respectabilitat de bellas cabeceras, dentre contenius patrocinaus y articlos absurdos u falsos, ni ganaremos lectors ni información, y deixaremos tresbatir o de bueno que ha teniu siempre o periodismo.
